ឯឯកឧត្តម លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយក កំពង់ផែស្វយ័តក្រុងព្រះសីហនុ បានដឹកនាំប្រតិភូ អញ្ចើញទស្សនកិច្ចសិក្សា ស្វែងយល់ពីក្រុមហ៊ុនចំណត ផែកុងតឺន័រ ហាកាតា (HAKATA Port Terminal Co., ltd) នៅទីក្រុងហ្វូកូកា
ដំណើរទស្សនកិច្ចសិក្សាស្វែងយល់ពីក្រុមហ៊ុនចំណតផែកុងតឺន័រហាកាតា (HAKATA Port Terminal Co., ltd)៖
ទីក្រុងហ្វូកូកា៖នាវេលាម៉ោង ១:០០ នាទីរសៀលថ្ងៃព្រហស្បតិ៍ ១កើត ខែចេត្រ ឆ្នាំម្សាញ់ សប្តស័ក ពុទ្ធ២៥៦៩ ត្រូវនឹងថ្ងៃទី១៩ ខែមីនា ឆ្នាំ២០២៦ ចំណតផែកុងតឺន័រហាកាតាប្រទេសជប៉ុន ឯកឧត្តម លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ (កសស) និងជាប្រធានក្រុមប្រឹក្សាភិបាល កសស អាណត្តិទី៩ និង ឯកឧត្តម ឡុង ឌីម៉ង់ អភិបាលរង នៃគណៈអភិបាលខេត្តព្រះសីហនុ តំណាង ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ បានដឹកនាំ សមាជិកនៃក្រុមប្រឹក្សាភិបាល កសស និងថ្នាក់ដឹកនាំ កសស ធ្វើដំណើរទស្សនកិច្ចសិក្សាស្វែងយល់ពីក្រុមហ៊ុនចំណតផែកុងតឺន័រហាកាតា (HAKATA Port Terminal Co., ltd) ដោយបានទទួលស្វាគមន៍ និងពិភាក្សាការងារ ជាមួយលោក Hiroyoshi Komada, ប្រធានក្រុមហ៊ុនចំណតផែកុងតឺន័រហាកាតា និងលោក Takeshi Koya, នាយកប្រតិបត្តិ ផែនការ ប្រតិបត្តិការ និងផ្សព្វផ្សាយ នៃ ការិយាល័យកំពង់ផែ និងអាកាសយានដ្ឋានទីក្រុងហ្វូកូកា ។
ក្រុមហ៊ុនចំណតផែកុងតឺន័រហាកាតា មានចំណតកុងតឺន័រអន្តរជាតិពីរ៖ ១. ចំណតផែកុងតឺន័រកាស្សី (Kashii CT) មានប្រវែង ៦០០ម៉ែត្រ គ្រឿងចក្រលើកដាក់កុងតឺន័រប្រភេទ QGC ៤គ្រឿង, ប្រភេទ Straddle Carrier ១៧គ្រឿង, និងមានសមត្ថភាពទីលានស្តុកកុងតឺន័រចំនួន 8,000TEUs និងចំណតផែកុងតឺន័រទីក្រុងកោះ (ICCT) មានប្រវែង ៨៩០ម៉ែត្រ គ្រឿងចក្រលើកដាក់កុងតឺន័រប្រភេទ QGC ៦គ្រឿង, ប្រភេទ RTG ២៦គ្រឿង, និងមានសមត្ថភាពទីលានស្តុកកុងតឺន័រចំនួន 27,680TEUs ។ ចំណតផែ Kashii CT និងICCT ប្រតិបត្តិការដោយប្រព័ន្ធ Hakata Port Logistics IT System (HiTS).ចំណតផែ Kashii CT និងICCT សម្រេចបានបរិមាណកុងតឺន័រឆ្លងកាត់ ៩០៧,០០០TEUs ក្នុងឆ្នាំ២០២៥ ដោយទទួលបានកំណើនជាមធ្យម ១,២% ក្នុងរយៈពេល ១៥ឆ្នាំ បរិមាណឆ្លងកាត់ពី 749,000TEUs (ឆ្នាំ2010) ដល់ 907,000 (ឆ្នំា2025) ។
