ឯកឧត្ដមបណ្ឌិត ម៉ក់ ជីតូ៖ ជំរុញរដ្ឋបាលស្រុកបូរីជលសារ និងស្រុកកោះអណ្តែត ពង្រឹងការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិ ភាព» និងទប់ស្កាត់បទល្មើស Scam Online

តាកែវ ៖ នាព្រឹកថ្ងៃអង្គារ ទី០៩ ខែមិថុនា ឆ្នាំ២០២៦ នៅសាលាស្រុកបូរីជលសារ និងស្រុកកោះអណ្តែត បានរៀបចំកិច្ចប្រជុំបូកសរុបលទ្ធផល តាមដានត្រួតពិនិត្យ និងជំរុញការអនុវត្តគោលនយោ បាយ «ភូមិ-ឃុំ-សង្កាត់ មានសុវត្ថិភាព» ក្រោមអធិបតីភាព ឯកឧត្ដម បណ្ឌិត ម៉ក់ ជីតូ រដ្ឋលេខាធិការក្រសួងមហាផ្ទៃ។

កិច្ចប្រជុំនេះក៏មានការអញ្ជើញចូលរួមពី អភិបាលស្រុកបូរីជលសារ និងកោះអណ្តែត និងជាប្រធានគណៈបញ្ជាការឯកភាពរដ្ឋបាលស្រុក កងកម្លាំងប្រដាប់អាវុធទាំងបីប្រភេទ អាជ្ញាធរឃុំ មេភូមិ ព្រមទាំងមន្ត្រីរាជការដែលពាក់ព័ន្ធ ជាច្រើនរូបទៀត។

មានប្រសាសន៍ក្នុងឱកាសនោះ ឯកឧត្ដម បណ្ឌិត ម៉ក់ ជីតូ រដ្ឋលេខាធិការក្រសួងមហាផ្ទៃ បានពាំនាំនូវការផ្តាំផ្ញើសាកសួរសុខទុក្ខពីសំណាក់ថ្នាក់ដឹកនាំក្រសួងមហាផ្ទៃ ព្រមទាំងបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់អាជ្ញាធរស្រុកទាំង២ ក្នុងការថែរក្សាសន្តិសុខ សណ្តាប់ធ្នាប់សាធា រណៈជូនប្រជាពលរដ្ឋនាពេលកន្លងមក។

ដើម្បីបន្តលើកកម្ពស់ប្រសិទ្ធភាពការងារ និងធានាបាននូវសេចក្តីសុខក្សេមក្សាន្តរបស់ប្រជាពលរដ្ឋស្របតាមគោលនយោបាយដ៏ខ្ពង់ខ្ពស់របស់រាជរដ្ឋាភិបាល, ឯកឧត្តមបណ្ឌិត រដ្ឋលេខាធិការ បានដាក់ចេញនូវទិសដៅការងារចម្បងៗ និងបានផ្តាំផ្ញើយ៉ាងម៉ឺងម៉ាត់ដល់ លោកអភិបាលស្រុកទាំង២ ដែលជាប្រធានគណៈបញ្ជាការឯកភាពរដ្ឋបាលស្រុក ត្រូវយកចិត្តទុកដាក់ខ្ពស់លើចំណុចគន្លឹះចំនួន ៤ រួមមាន៖
ទី១. ការទប់ស្កាត់បទល្មើសបច្ចេកវិទ្យា (Scam Online)៖ ត្រូវចុះតាមដាន ត្រួតពិនិត្យ និងក្តាប់ព័ត៌មានឱ្យបានជាប់ជាប្រចាំ ដាច់ខាតមិនត្រូវឱ្យមានទីតាំងឆបោកតាមប្រព័ន្ធអនឡាញ (Scam Online) បង្កប់ខ្លួន ឬបើកដំណើរការនៅក្នុងមូល ដ្ឋានស្រុកបូរីជលសារជាដាច់ខាត។

ទី២. ការគ្រប់គ្រងក្មេងទំនើង៖ ណែនាំឱ្យកងកម្លាំងទាំង ៣ ប្រភេទ (កងរាជអាវុធហត្ថ នគរបាល និងយោធា) សហការគ្នាឱ្យបានជិតស្និទ្ធ ដើម្បីគ្រប់គ្រង ម៉ៅការ និងទប់ស្កាត់រាល់សកម្មភាពក្មេងទំនើងក្នុងមូលដ្ឋាន មិនឱ្យបង្កការអសន្តិសុខដល់សង្គមឡើយ។

ទី៣. ការលុបបំបាត់ល្បែងស៊ីសង បន្តយុទ្ធនាការបង្ក្រាប និងលុបបំបាត់រាល់ការលេងល្បែងស៊ីសងគ្រប់ប្រភេទក្នុងមូលដ្ឋាន ទោះបីជាក្នុងរូបភាពណាក៏ដោយ។

និងទី៤. ត្រូវរៀបចំផែនការចុះអប់រំ និងផ្សព្វផ្សាយច្បាប់ស្តីពីចរាចរណ៍ផ្លូវគោកឱ្យបានទូលំទូលាយ ទាំងនៅតាមមូលដ្ឋានភូមិ-ឃុំ និងនៅតាមគ្រឹះស្ថាន សិក្សានានា ដើម្បីលើកកម្ពស់ការយល់ដឹង និងកាត់បន្ថយគ្រោះថ្នាក់ចរាចរណ៍។

ជាចុងក្រោយ ឯកឧត្ដម បណ្ឌិត ម៉ក់ ជីតូ រដ្ឋលេខាធិការ ក្រសួងមហាផ្ទៃ បានសង្កត់ធ្ងន់ថា គណៈបញ្ជាការឯកភាពរដ្ឋបាលស្រុក ត្រូវតែដើរតួនាទីជាស្នូលក្នុងការដឹកនាំ សម្របសម្រួល និងមានវិធានការឱ្យបានទាន់ពេលវេលា ចំពោះរាល់បាតុភាពអសកម្មនានា ដើម្បីធ្វើយ៉ាងណាឱ្យស្រុកបូរីជលសារ និងស្រុកកោះអណ្តែត ប្រែក្លាយជាមូលដ្ឋានគំរូមួយ ក្នុងការអនុវត្តគោលនយោបាយ ភូមិ-ឃុំ-សង្កាត់មានសុវត្ថិភាព ឱ្យមានប្រសិទ្ធភាពខ្ពស់បំផុត៕