ពិធីបើកវគ្គបណ្ដុះបណ្ដាលស្ដីពី យុទ្ធវិធីប្រតិបត្តិការ និងបាញ់គ្រាប់ពិត ក្រោមអធិបតីភាពឯកឧត្តម ឧត្តមសេនីយ៍ឯក ជីវ ផល្លី និងលោកឧត្តមសេនីយ៍ទោ សុក សំបូរ
===============
(ភ្នំពេញ)៖នៅព្រឹកថ្ងៃទី១៣ ខែកក្កដា ឆ្នាំ២០២៦ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកឧត្តមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន បានអញ្ជើញចូលរួមជាអធិបតីក្នុងពិធីបើកវគ្គបណ្ដុះបណ្ដាលស្ដីពី យុទ្ធវិធីប្រតិបត្តិការ និងបាញ់គ្រាប់ពិត។

ដោយមានការចូលរួមពីលោកឧត្តមសេនីយ៍ទោ សុខ ងី និងលោកឧត្តមសេនីយ៍ទោ គឹម ភាព អនុប្រធាននាយកដ្ឋាន ព្រមទាំងលោក ជីម ម៉េកម៉ូរ៉េន ប្រធានផ្នែកហិរញ្ញវត្ថុ និងជាប្រធានកម្មវិធី AIM លោក Mark Jenkins គ្រូបង្ហាត់ ៦នាក់ មកពីសហរដ្ឋអាមេរិក លោក ស្រេង រដ្ឋា នាយករងកម្មវិធីសង្គ្រោះនៃអង្គការមេត្រីអន្តរជាតិ រួមជាមួយថ្នាក់ដឹកនាំ មន្ត្រីនគរបាល ភ្ញៀវកិត្តិយស និងសិក្ខាកាមជាច្រើនរូប ។ វគ្គបណ្តុះបណ្តាលនេះរៀបចំឡើងដោយមានកិច្ចសហការឧបត្ថម្ភពីអង្គការមេត្រីអន្តរជាតិ (AIM SWAT)។ ពិធីនេះប្រារព្ធធ្វើនៅសាលប្រជុំនាយកដ្ឋានប្រឆាំងការជួញដូរមនុស្ស និងការពារអនីតិជន។

ជាកិច្ចចាប់ផ្តើម លោកឧត្តមសេនីយ៍ទោ សុខ សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន បានមានប្រសាសន៍ថា ការជួញដូរមនុស្ស គឺជាបទល្មើសធ្ងន់ធ្ងរដែលប៉ះពាល់ដល់សិទ្ធិមនុស្ស សន្តិសុខសង្គម និងការអភិវឌ្ឍប្រកបដោយចីរភាព។ ដើម្បីឆ្លើយតបទៅនឹងបញ្ហានេះ មន្ត្រីនគរបាលត្រូវតែមានចំណេះដឹង ជំនាញ និងការត្រៀមខ្លួនខ្ពស់ ទាំងផ្នែកច្បាប់ ការស៊ើបអង្កេត ការរៀបចំ និងអនុវត្តប្រតិបត្តិការ ព្រមទាំងការប្រើប្រាស់អាវុធ ប្រកបដោយវិជ្ជាជីវៈ សុវត្ថិភាព និងស្របតាមច្បាប់។

លោកឧត្តមសេនីយ៍ទោ សុខ សំបូរ មានប្រសាសន៍បន្តថា វគ្គបណ្តុះបណ្តាលនេះ មានគោលបំណងពង្រឹងសមត្ថភាពមន្ត្រីក្នុងការរៀបចំផែនការ និងអនុវត្តប្រតិបត្តិ ការបង្ក្រាបបទល្មើសប្រកបដោយប្រសិទ្ធភាព ពង្រឹងជំនាញក្នុងការប្រើប្រាស់អាវុធ និងការហ្វឹកហ្វឺនបាញ់គ្រាប់ពិត ដោយគោរពយ៉ាងម៉ឺងម៉ាត់នូវវិធានសុវត្ថិភាព ស្តង់ដារវិជ្ជាជីវៈ និងគោលការណ៍គោរពសិទ្ធិមនុស្ស។ លោកឧត្តមសេនីយ៍ទោ លើកទឹកចិត្តដល់សិក្ខាកាមទាំងអស់ ឱ្យយកចិត្តទុកដាក់សិក្សា ចូលរួមយ៉ាងសកម្មក្នុងការហ្វឹកហ្វឺន ផ្លាស់ប្តូរបទពិសោធន៍ និងអនុវត្តតាមការណែនាំរបស់គ្រូឧទ្ទេស ដើម្បីទទួលបានចំណេះដឹង និងជំនាញដែលអាចយកទៅអនុវត្តបានយ៉ាងមានប្រសិទ្ធភាពក្នុងការបំពេញភារកិច្ច។

ក្នុងឱកាសនោះ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ បានថ្លែងអំណរគុណចំពោះអង្គការមេត្រីអន្តរជាតិ ដែលបានបន្តផ្តល់កិច្ចសហការ និងគាំទ្រផ្នែកបច្ចេកទេស ធនធាន និងការបណ្តុះបណ្តាលជាបន្តបន្ទាប់ ដើម្បីលើកកម្ពស់សមត្ថភាពមន្ត្រីអនុវត្តច្បាប់កម្ពុជា។

ឯកឧត្តម ឧត្តមសេនីយ៍ឯក ជីវ ផល្លី បានគូសបញ្ជាក់ថា កន្លងមកអង្គការ AIM បានសហការរៀបចំវគ្គបណ្តុះបណ្តាលជាច្រើន រួមមានការកំណត់អត្តសញ្ញាណជនរងគ្រោះ ការប្រើប្រាស់ដ្រូន និងការបណ្តុះបណ្តាលយុទ្ធវិធីប្រតិបត្តិការ ដែលបានរួមចំណែកយ៉ាងសំខាន់ក្នុងការពង្រឹងសមត្ថភាពមន្ត្រីជំនាញ។ ជាមួយគ្នានេះ ឯកឧត្តម ឧត្តមសេនីយ៍ឯក បានលើកទឹកចិត្តដល់សិក្ខាកាមទាំងអស់ ឱ្យខិតខំសិក្សា ចូលរួមហ្វឹកហ្វឺនដោយយកចិត្តទុកដាក់ ផ្លាស់ប្តូរបទពិសោធន៍ និងអនុវត្តតាមការណែនាំរបស់គ្រូបង្ហាត់ ដើម្បីទទួលបានជំនាញដែលអាចយកទៅប្រើប្រាស់ជាក់ស្តែង ក្នុងការបំពេញភារកិច្ចប្រកបដោយប្រសិទ្ធភាព និងវិជ្ជាជីវៈខ្ពស់ ក្នុងការប្រយុទ្ធប្រឆាំងការជួញដូរមនុស្ស និងការពារជនរងគ្រោះ ជាពិសេសស្ត្រី និងកុមារផងដែរ៕