ឯកឧត្តម លូ គឹមឈន់ ប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកស្រីសន្ធរ អញ្ចើញជាអធិបតីភាពក្នុងពិធីជួបសំណេះសំណាល និងអបអរសាទរសិស្សានុសិស្សស្រុកស្រីសន្ធរ ដែលប្រឡងជាប់សញ្ញាបត្រមធ្យមសិក្សាទុតិយភូមិ ឆ្នាំ២០២៦ នៅវិទ្យាល័យស្រីសន្ធរ
==============
នារសៀលថ្ងៃទី១១ ខែកញ្ញា ឆ្នាំ២០២៦ ឯកឧត្តម លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកកំពង់ផែស្វយ័តក្រុងព្រះសីហនុ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកស្រីសន្ធរ បានអញ្ចើញជាអធិបតីភាពក្នុងពិធីជួបសំណេះសំណាល និងអបអរសាទរសិស្សានុសិស្សស្រុកស្រីសន្ធរ ដែលប្រឡងជាប់សញ្ញាបត្រមធ្យមសិក្សាទុតិយភូមិ ឆ្នាំ២០២៦ នៅវិទ្យាល័យស្រីសន្ធរ។ដោយមានចូលរួមពី ឯកឧត្តម ឃន ប្រុស អភិបាលរងខេត្តកំពង់ចាម តំណាងឯកឧត្តម អ៊ុន ចាន់ដា អភិបាលខេត្តកំពង់ចាម និងមានការនិមន្តចូលរួមពី ព្រះវិសុទ្ធមុនី រស់ លីមខូយ ព្រះអនុគណស្រុក និងជាព្រះចៅអធិការវត្តកោះកែវ ព្រមទាំងថ្នាក់ដឹកនាំ ក្រុមការងារ និងអង្គភាពពាក់ព័ន្ធ។

ក្នុងឱកាសនោះ ឯកឧត្តម លូ គឹមឈន់ ប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកស្រីសន្ធរ បានមានប្រសាសន៍ថា ការទទួលបានជ័យលាភីនិទ្ទេស A, B, C, D និង E ចំនួន ៦៨៣នាក់ គឺជាសមិទ្ធផលដ៏ថ្លៃថ្លា និងគួរឱ្យមោទនភាពដែលកើតចេញពីការខិតខំ ប្រឹងប្រែងសិក្សារៀនសូត្ររបស់សិស្សានុសិស្ស ការយកចិត្តទុកដាក់បង្ហាត់បង្រៀនរបស់លោកគ្រូ អ្នកគ្រូ ព្រមទាំងការគាំទ្រ និងលើកទឹកចិត្តពីឪពុកម្តាយ អាណាព្យាបាល និងសង្គមទាំងមូល។

ជ័យលាភីនេះ មិនត្រឹមតែជាកិត្តិយសសម្រាប់សិស្សានុសិស្ស និងក្រុមគ្រួសារប៉ុណ្ណោះទេ ប៉ុន្តែថែមទាំង ជាមោទនភាពរបស់សាលារៀន ស្រុក និងខេត្តផងដែរ។
ឯកឧត្តមបានបន្តថា ការសិក្សារៀន សូត្រ និងការរៀនជំនាញ មិនត្រឹមតែផ្តល់ចំណេះដឹង សម្រាប់ប្រកបអាជីពប៉ុណ្ណោះទេ ប៉ុន្តែថែមទាំងជាមូលដ្ឋានសម្រាប់ការរៀនសូត្រមេរៀនជីវិត ជួយឱ្យយើងចេះគិត ចេះដោះស្រាយបញ្ហា មានការទទួលខុសត្រូវ អត់ធ្មត់ និងមានសមត្ថភាព ប្រឈមមុខនឹងបញ្ហាប្រឈមនានា។ ចំណេះដឹង ជំនាញ និងបទពិសោធន៍ដែលទទួលបាន នឹងក្លាយជាមូលដ្ឋានដ៏សំខាន់សម្រាប់កសាងអនាគត និងរួមចំណែកអភិវឌ្ឍគ្រួសារ សង្គម និងប្រទេសជាតិ។

ក្នុងឱកាសដ៏មានអត្ថន័យនេះ ឯកឧត្តមប្រធានបានផ្តល់រង្វាន់លើកទឹកចិត្តដល់សិស្សានុសិស្ស លោកគ្រូ អ្នកគ្រូ និងអ្នកពាក់ព័ន្ធ ដូចខាងក្រោម៖
សូមជម្រាបថា៖ អំណោយរបស់សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី តាមរយៈឯកឧត្តម លូ គឹមឈន់ រួមមាន៖
១-សិស្សនិទ្ទេស A ចំនួន ១១នាក់ម្នាក់ទទួលបាន ម៉ូតូ HONDA WAVE ១គ្រឿង + មួកសុវត្ថិភាព និងថវិកា ១០០ដុល្លារ (ព្រះអនុគុណស្រុក)។
២-សិស្សពូកែចំនួន ៥នាក់ ម្នាក់ទទួលបាន Tablet ១គ្រឿង និងថវិកា ១០០ដុល្លារ។
៣-សិស្សនិទ្ទេស B ចំនួន ៥៨នាក់ ម្នាក់ទទួលបានថវិកា ២០០.០០០ រៀល។
៤-សិស្សនិទ្ទេស C ចំនួន ១៤០នាក់ម្នាក់ទទួលបានថវិកា ១០០.០០០ រៀល។
៥-សិស្សនិទ្ទេស D ចំនួន ២៣៩នាក់ម្នាក់ទទួលបានថវិកា ៥០.០០០ រៀល។
៦-សិស្សនិទ្ទេស E ចំនួន ២៣៥នាក់ម្នាក់ទទួលបានថវិកា ៥០.០០០ រៀល។
៧-នាយក និងគ្រូបង្រៀនថ្នាក់ទី១២ ចំនួន ១៣៩នាក់ម្នាក់ទទួលបានថវិកា ១០០.០០០ រៀល។
៨-មន្ត្រីរដ្ឋបាលស្រុក និងអ្នកពាក់ព័ន្ធ ចំនួន ១០០នាក់ម្នាក់ទទួលបានថវិកា ៥០.០០០ រៀល។