លោកឧត្តមសេនីយ៍ទោ ហេង វុទ្ធី ៖ ណែនាំដល់គ្រប់កងកម្លាំង ត្រូវបន្ដរក្សានូវក្រមសីលធម៌ ជំនាញវិជ្ជាជីវៈ និងឥរិយាបទសមរម្យក្នុងការបម្រើប្រជាពលរដ្ឋ ព្រមទាំងបំពេញការងារដោយភាពស្មោះត្រង់ តម្លាភាព និងទំនួលខុសត្រូវខ្ពស់បំផុត

ដោយអនុវត្តតាមអនុសាសន៍ដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម នៅព្រឹកថ្ងៃព្រហស្បតិ៍ ទី១៧ ខែកញ្ញា ឆ្នាំ២០២៦ នេះ លោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម អញ្ជើញដឹកនាំកិច្ចប្រជុំបូកសរុបសភាពការណ៍ លទ្ធផលកិច្ចប្រតិបត្តិការ រក្សាសន្តិសុខសង្គម ការងារនគរបាល សហគមន៍ ប្រចាំខែកញ្ញា និង៩ខែ ឆ្នាំ២០២៦ និងលើកទិសដៅការងារបន្ដ ប្រព្រឹត្តទៅនៅសាលាប្រជុំធំ នៃស្នងការដ្ឋាននគរបាលខេត្តកំពង់ចាម ។

ក្នុងកិច្ចប្រជុំនេះ លោកឧត្តមសេនីយ៍ទោ ហេង វុទ្ធី បានលើកឡើងអំពីវឌ្ឍនភាព នៃការអនុវត្តជំនាញនាពេលកន្លងមកនេះ រក្សាបាននូវនិរន្តរភាពការងារក្នុងអង្គភាព បានកាន់តែល្អប្រសើរ ។

ជាមួយគ្នានេះ លោកឧត្តមសេនីយ៍ស្នងការ បានណែនាំដល់គ្រប់កងកម្លាំង ត្រូវបន្ដរក្សានូវក្រមសីលធម៌ ជំនាញវិជ្ជាជីវៈ និងឥរិយាបទសមរម្យក្នុងការបម្រើប្រជាពលរដ្ឋ ព្រមទាំងបំពេញការងារដោយភាពស្មោះត្រង់ និងតម្លាភាព រួមបញ្ចូលទាំងការកំណត់នូវចំណេះដឹង សមត្ថភាព និងបទពិសោធន៍ ដែលចាំបាច់សម្រាប់តួនាទី ភារកិច្ច និងទំនួលខុសត្រូវ ខ្ពស់បំផុត។

ស្របពេលពិធីដាក់បិណ្ឌ-ភ្ជុំបិណ្ឌ ខិតជិតចូលមកដល់ ត្រូវយកចិត្តទុកដាក់ខ្ពស់ លើកិច្ចសហការជាមួយអាជ្ញាធរមូលដ្ឋាន ដើម្បីធានាឱ្យបាននូវការរក្សាសណ្តាប់ធ្នាប់សាធារណៈ ការពារសន្តិសុខ និងសុវត្ថិភាព នៅតាមទីវត្តអារាម និងកន្លែងកំសាន្តនានា ។

ទន្ទឹមនឹងនេះ គ្រប់ជំនាញពាក់ព័ន្ធ ត្រូវពង្រឹងការគ្រប់គ្រង និងការអនុវត្តដីកាលើមុខសញ្ញាគ្រប់ប្រភេទ ប្រកបដោយប្រសិទ្ធភាព និងត្រូវ បង្ការ ទប់ស្កាត់ និងបង្ក្រាប រាល់បទល្មើស តាមរូបភាពងើបមួយវាយមួយ ងើបពីរវាយពីរ ។

ជាចុងក្រោយលោកឧត្តមសេនីយ៍ទោ ហេង វុទ្ធី បានជំរុញឱ្យដល់កងកម្លាំងទាំងអស់ ត្រូវបន្ដការអភិវឌ្ឍសមត្ថភាពជាប្រចាំ តាមរយៈការរៀនសូត្រ បង្កើនចំណេះដឹងវិជ្ជាជីវៈ និងទាញយកប្រយោជន៍ពីបច្ចេកវិទ្យាឌីជីថល គឺជារឿងសំខាន់ ដើម្បីធ្វើបច្ចុប្បន្នភាពការងារឱ្យទាន់សម័យកាល និងធានានិរន្តរក្នុងភាពអង្គភាព ។